Nýr innflytjandi á Íslandi

Velkomin til Íslands

Það er stórt skref að flytja til nýs lands.
Það getur tekið langan tíma að aðlagast breyttum aðstæðum, finna nýtt lífsviðurværi og skapa sér og fjölskyldu sinni gott heimili.
Það er eðlilegt að upplifa margskonar tilfinningar á leiðinni, eins og gleði, bjartsýni, og tilhlökkun. En einnig tilfinningar eins og sorg, kvíða, vonbrigði, eftirsjá, þreytu og pirring.
Þótt margt sé öðruvísi, skrýtið og erfitt er líka margt gott og áhugavert. Það er þess virði að vera forvitin/n og jákvæð/ur gagnvart nýjum hlutum.
Stundum er sagt: „Góðir hlutir gerast hægt“. Sýndu þolinmæði, líka gagnvart sjálfum þér.

Námskeiðið Samfélagsfræðsla

Markmið námskeiðsins eru fræðsla, umræður og innsýn í helstu þætti íslensks samfélags. Kaflarnir heita:
- Nýr innflytjandi á Íslandi
- Saga, landafræði og lífshættir
- Börn og fjölskyldur
- Heilbrigðismál
- Menntun og hæfni
- Atvinnulíf
- Lýðræði og velferðarsamfélag
Kennsluefnið er á glærum á sjö tungumálum (íslensku, ensku, arabísku, kúrdísku, farsi, pólsku og spænsku). Það er bæði skrifað og lesið upp.
Kennsluleiðbeiningar eru fyrir kennara.
Myndbönd sem sýna þætti úr íslenskum veruleika eru í upphafi hvers kafla.
Allt efnið er aðgengilegt á www.landneminn.is

Almennt um Ísland

Ísland er eyja í Atlantshafi og er hluti af norður Evrópu.
Landið er 103.000 km2 og íbúar rúmlega 364.000 (1. jan. 2020).
Fólkið í landinu býr meðfram strandlengjunni en enginn á hálendinu.
Langflestir búa á höfuðborgarsvæðinu.
Höfuðborg Íslands heitir Reykjavík.
Á Íslandi er mikið af fjöllum, fjörðum, dölum og víðáttu.
Þar eru einnig jöklar og fossar og fáir skógar.
Það snjóar oft á veturna og þá er dimmt – en mjög bjart á sumrin.
Ísland er lýðveldi síðan 1944.
Kosningar til alþingis eru á 4ja ára fresti. Ríkisstjórn er mynduð eftir kosningar.
Ísland er friðsælt land með engan innlendan her.
Kynjajafnrétti og mannréttindi eru fest í lög.
Ísland er velferðarríki. Það þýðir m.a. að fólk greiðir tiltölulega háa skatta af launum en fær margvíslega þjónustu á móti.
Fyrirtækjum og einstaklingum ber skylda til að greiða skatta af tekjum sínum til ríkisins.
Mikilvægir atvinnuvegir á Íslandi eru sjávarútvegur og ferðamannaiðnaður.
Landbúnaður (kjöt og grænmeti) er stundaður og einnig eru stórar virkjanir til að framleiða rafmagn.
Margir vinna einnig í opinberri stjórnsýslu og þjónustu, í skólakerfinu og heilbrigðiskerfinu. Iðnaður og framleiðsla matvæla er líka stór þáttur í íslenskum vinnumarkaði.

Fjölmenningarsetur

Fjölmenningarsetur (Multicultural and Information Center) er staðsett á Árnagötu 2-4, 400 Ísafirði.
Fjölmenningarsetur er með vefsíðuna www.mcc.is
Þar má finna ítarlegar og gagnlegar upplýsingar á mörgum tungumálum um flutning til landsins eða búsetu á Íslandi.
Upplýsingagjöf í síma 450 3090 og netfang mcc@mcc.is
Fjölmenningarsetur er opinber stofnun. Ráðgjöf til stofnana og sveitarfélaga um móttöku flóttafólks er eitt af verkefnum setursins.