Heilsuefling og forvarnir
- Það eru fáir sólardagar á Íslandi. Öllum er ráðlagt að taka inn D-vítamín (þorskalýsi eða D-vítamín töflur). Ráðlagður dagskammtur fer eftir aldri.
- Sjúkraþjálfarar vinna bæði á sjúkrahúsum og á einkastofum. Þeir meðhöndla verki í stoðkerfinu. Hægt er að fá beiðni frá lækni til sjúkraþjálfara og greiða þá sjúkratryggingar stóran hluta af kostnaði.
- Nuddarar og heilsuþjálfarar eru einnig starfandi á líkamsræktar-stöðvum og á einkastofum.
- Gönguhópar eru starfandi víða um land. Þeir eru sjálfstætt starfandi eða í tengslum við íþróttafélög og útivistarsamtök, www.utivist.is og www.ferdafelagid.is
- Fólk leitar til sálfræðinga (eða geðlækna) til að fá hjálp við t.d. kvíða og þráhyggju eða til að vinna úr áföllum.
- Sálfræði- og ráðgjafastofur bjóða einnig upp á hjónabands- og fjölskylduráðgjöf.
- Sjúkratryggingar Íslands greiða ekki fyrir einkarekna sálfræðiþjónustu en hægt er að leita til stéttarfélags eða félagsþjónustu sveitarfélaga og óska eftir greiðsluþátttöku.
- Sálfræðingar starfa einnig innan heilsugæslunnar og á sjúkrahúsum.
- Líkamsræktarstöðvar eru margar á Íslandi. Þar er hægt að æfa í tækjasal eða sækja ýmis konar hóptíma í líkamsrækt.
- Að stunda líkamsrækt er algengt á Íslandi, bæði hjá konum og körlum.
- Sund er stór þáttur í menningu Íslendinga, hjá konum, körlum og börnum. Margir fara í sund á hverjum degi, hitta kunningja og spjalla saman í heitu pottunum. Margir innflytjendur – líka konur – fara í sund á Íslandi og finnst það frábært!
- Sundleikfimi er í boði í mörgum sundlaugum og er sérstaklega vinsæl meðal eldri borgara.
- Í sundlaugunum eru heitir pottar, nuddpottar og gufubað.
- Sund er mikil heilsubót, líka bara það að sitja úti í heitum potti!
- Skipulögð leit við krabbameini í brjóstum og leghálsi fer fram á Íslandi.
- Skimun fyrir leghálskrabbameini hjá konum fer fram hjá heilsugæslunni um allt land. Hjúkrunarfræðingar og ljósmæður taka sýnin.
- Konum á aldrinum 23-29 ára er boðið á 3ja ára fresti í skimun. Konum á aldrinum 30-65 ára er boðið í skimun á 5 ára fresti.
- Landspítalinn sér um skimun fyrir krabbameini í brjóstum í samvinnu við Sjúkrahúsið á Akureyri.
- Konum á aldrinum 40-74 ára er boðið í skimun við krabbameini í brjóstum á 2ja ára fresti.
- Boð í skimun er sent bréflega og birtist líka rafrænt á www.island.is undir „mínar síður“.
- Niðurstöður eru birtar rafrænt á www.island.is („mínar síður) og www.heilsuvera.is . Einnig er haft samband beint við konur ef ástæða er til.
- Á www.heilsuvera.is er hægt að sjá boðanir, mætingar og niðurstöður skimana. Bæði eðlilegar niðurstöður og þegar tilefni er til nánari skoðunar.
- Krabbamein í ristli hjá konum og körlum og blöðruhálsi (hjá körlum) er einnig algengt og nauðsynlegt að fylgjast með því frá 50 ára aldri.
- Á Íslandi eiga allir að nota bílbelti í bílum. Bílbelti hafa bjargað mörgum mannslífum í umferðarslysum.
- Börn eiga, lögum samkvæmt, alltaf að vera í barnabílstólum sem hæfa þyngd þeirra og aldri.
- Börn eru einnig skyldug til að vera með reiðhjólahjálm þegar þau eru á hjóli.
- Endurskinsmerki á úlpur og töskur eru nauðsynleg á veturna, bæði fyrir börn og fullorðna.
Andleg líðan - Hjálp
- Neyðarlínan sími 112 og www.112.is (netspjall)
- Hjálparsími Rauða krossins. Hann er alltaf opinn, trúnaði heitið og ókeypis. Sími 1717 og netspjall á www.1717.is.
- Píeta samtökin www.pieta.is, sinna forvarnarstarfi gegn sjálfsvígum og sjálfsskaða og styðja við aðstandendur. S. 552 2218, alltaf opinn.
- Landssamtökin Geðhjálp, www.gedhjalp.is, s. 570 1700. Hjá Geðhjálp starfa m.a. fagmenntaðir ráðgjafar sem veita þjónustu fyrir fólk með geðraskanir og aðstandendur þeirra án endurgjalds. Ráðgjafar eru bundnir trúnaði.
- Hugarafl. Félagasamtök fólks sem hefur upplifað persónulega krísu og vinnur að persónulegum bata sínum. Fjölbreytt hópastarf. www.hugarafl.is S. 414 1550.
Fíkn - Hjálp
- SÁÁ. Meðferð við áfengis- og fíknivanda fyrir karla, konur og ungmenni. Sálfræðiþjónusta fyrir börn alkóhólista. www.saa.is S. 530 7600.
- AA samtökin, www.aa.is Samtök karla og kvenna í bata frá áfengisfíkn.
- Neyðarsímar AA samtakanna: s. 895-1050 Reykjavíkursvæðið, s. 849-4012 Akureyri og s. 777-5504 Reykjanes. AA fundir eru um allt land.
- Um ofbeldi í nánum samböndum og aðstoð vegna þess, sjá kafla 3. Börn og fjölskyldur.
Góð heilsa – gulli betri
- Það bætir líkamlega og andlega heilsu:
- að sofa vel
- að borða hollan og góðan mat
- að hreyfa sig og styrkja líkamann
- að fara út daglega – líka á veturna og nýta dagsbirtuna
- að passa upp á streitu og hafa jafnvægi í lífinu
- að hugsa jákvætt
- að eiga góð samskipti við fjölskyldu og vini
- að gera það sem veitir manni ánægju
- að fá andlega næringu
- að reykja ekki
- að sleppa áfengi