Samvinna heimilis og skóla

Samvinna heimilis og skóla er mikilvæg. https://reykjavik.is/foreldravefurinn
Börn, foreldrar og kennarar þurfa að tala saman og vera í samskiptum um það hvernig gangi í skólanum. Það má alltaf hringja eða senda kennara tölvupóst og fá upplýsingar um nám, hegðun eða líðan barns.
Það er mikilvægt að foreldrar fylgist vel með heimanámi barna sinna og hjálpi þeim að sinna því vel.
Læsi er undirstaða fyrir allt nám. Öll börn eiga að lesa heima, upphátt fyrir foreldri, a.m.k. fimm sinnum í viku.
Á www.mms.is og www.fraedslugatt.is er mikið af ókeypis efni fyrir börn í grunnskóla til að æfa ýmsar námsgreinar.
Foreldrar velja bekkjarfulltrúa í bekk eða árgangi sem skipuleggja viðburði fyrir bekkinn og foreldra að gera eitthvað saman.
Foreldrafélög eru starfandi í skólum. Þau skipuleggja t.d. fræðslufundi fyrir foreldra og hverfarölt um helgar.
Facebook hópar foreldra eru algengir í skólastarfi. Þar er t.d. boðið í afmæli bekkjarfélaga eða auglýst eftir týndum fötum eða hlutum.
Foreldrar þurfa að fylgjast vel með tölvupóstum frá skólanum og kennurum, heimasíðu skólans og upplýsingum í Mentor.

Frístundaheimili 

Öll sveitarfélög bjóða upp á vist á frístundaheimili eftir skóla fyrir börn í 1.-4. bekk frá kl. 13.30-17.00 mánudaga til föstudaga
Fyrir fötluð börn og ungmenni er lengd viðvera einnig í boði eftir skóla frá 5. bekk til 18 ára aldurs. https://www.stjornarradid.is/verkefni/felags-og-fjolskyldumal/fatlad-folk/leidbeinandi-reglur-fyrir-sveitarfelog/
Það er nauðsynlegt að skrá börnin sín í frístund og velja klukkan hvað þau eru sótt eða hvort þau eigi að ganga heim.
Skráning er oftast rafræn í gegnum vef sveitarfélagsins.
Frístund er ekki ókeypis. Gjaldið fer eftir hverju sveitarfélagi fyrir sig.
Það er frjálst val að nýta frístundaheimili en margir foreldrar nýta frístund eftir skóla því þeir eru að vinna.

Frístundaheimili eru afar mikilvæg fyrir félagsþroska barna og tungumálaörvun.
Á frístundaheimilum er faglegt og fjölbreytt starf, börnin t.d.:
- Spila, föndra og gera árstíðabundin verkefni.
- Leika sér saman, úti og inni.
- Taka þátt í hópastarfi eins og jógaklúbbi, leiklist eða tölvuklúbbi.
Börnin fá léttan mat (til dæmis AB mjólk og múslí eða brauð og álegg) og einnig ávexti og grænmeti yfir daginn.
Í bæði skóla og í frístund fara börnin út á hverjum degi og eiga að vera klædd eftir veðri. Börnin eru alltaf undir eftirliti.

Í stærri bæjarfélögum er gjarnan frístundarúta sem keyrir börn frá frístundaheimilum á íþróttaæfingar eða annað skipulagt frístundastarf innan hverfisins. (Foreldrar sækja börnin sín eða þau fara sjálf heim).
Nokkrir starfsdagar fyrir starfsfólk eru á frístundaheimilum á hverju skólaári. Þá er ekki opið fyrir börnin.
Á sumrin þegar skólinn er lokaður eru frístundaheimilin með sumarnámskeið fyrir börn. Þá er oft farið í sund og vettvangs- og ævintýraferðir. Það þarf að skrá börn á sumarnámskeið og greiða fyrir þau.
Mörg íþróttafélög og fleiri félög bjóða upp á sumarnámskeið fyrir börn.

Rannsóknir sýna að börn sem tala íslensku sem annað mál taka lítinn þátt í íþrótta- eða frístundastarfi fyrir börn.
Að taka þátt í frístundastarfi fyrir utan skólann skiptir miklu máli fyrir öll börn.
Þau þjálfa færni og hæfileika á nýjum sviðum, þau þjálfa félagsleg tengsl, eignast vini og læra og nota íslensku á fjölbreyttari hátt en eingöngu í skólanum.
Börn af erlendum uppruna sem stunda frístundastarf eru þátttakendur í sameiginlegum reynsluheimi með bekkjarfélögum sínum sem er mikilvægt fyrir aðlögun að nýju samfélagi.
Skipulagt íþrótta- og frístundastarf á Íslandi er faglegt og áhersla lögð á góð samskipti, samvinnu og hollt líferni.

Í öllum hverfum Reykjavíkur og í öllum bæjum eru starfandi íþróttafélög. Þau bjóða upp á íþróttastarf fyrir börn. Fótbolti og handbolti er t.d. vinsæl íþrótt hjá bæði strákum og stelpum.
Tónlistarskólar, fimleikafélög, sundfélög, dansskólar, karatefélög og skátafélög eru dæmi um félög sem bjóða upp á námskeið fyrir börn.
Foreldrar taka gjarnan virkan þátt í frístundastarfi barna og fara með þeim á íþróttamót, tónleika eða sýningar.
Oft er fjölbreytt foreldrastarf hluti af frístundastarfi barna – og það er góð leið til að kynnast öðrum foreldrum og til að æfa íslenskuna.
Munið eftir frístundastyrknum!

Samvinna heimilis og skóla​